បាត់ដំបង៖ ក្នុងពិធីប្រគល់សញ្ញាបត្រជូនដល់និស្សិតជ័យលាភីនៅសាកលវិទ្យាល័យគ្រប់គ្រង និងសេដ្ឋកិច្ច សាខាខេត្តបាត់ដំបង នៅព្រឹកថ្ងៃទី១២ ខែធ្នូ ឆ្នាំ២០២២ អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងទ័ពជើងគោក លោកឧត្តមសេនីយ៍ឯក ហ៊ុន ម៉ាណែត បានណែនាំឱ្យនិស្សិតបន្តរៀនសូត្រ និងត្រូវអភិវឌ្ឍខ្លួនឱ្យស្របជាមួយនឹងដំណើរអភិវឌ្ឍន៍រួមរបស់ស្ថាប័ន អង្គភាព និងសង្គមជាតិ ដើម្បីក្លាយជាធនធានមនុស្សសម្រាប់អភិវឌ្ឍប្រទេសប្រកបដោយចរីភាព។
លោកឧត្តមសេនីយ៍ឯក ហ៊ុន ម៉ាណែត បានលើកឡើងថា យុវជនស្ថិតក្នុងសម័យកម្ពុជាមានសន្តិភាពមានឱកាសសិក្សាបានច្រើន បើធៀបនឹងឪពុកម្តាយរបស់ពួកគេនៅជំនាន់កម្ពុជាមានសង្គ្រាមពុំមានឱកាសសិក្សារៀនសូត្របានច្រើននោះទេ ប៉ុន្តែលោកបានខិតខំតស៊ូចិញ្ចឹមបីបាច់ថែរក្សា និងផ្តល់ទំនុកបម្រុងឱ្យសិក្សារៀនសូត្របានខ្ពង់ខ្ពស់ និងមានអនាគតល្អត្រចេះត្រចង់។
លោកបន្តថា ការអប់រំបានធ្វើឱ្យយុវជនក្លាយជាធនធានមនុស្ស ដែលជាទ្រព្យដ៏សំខាន់សម្រាប់ដំណើរការកសាងប្រទេសឱ្យមានការរីកចម្រើនប្រកបដោយចីរភាព និងនិរន្តភាព។
លោកនិយាយថា៖ «សមត្ថភាពជំនាញរបស់ប្រជាពលរដ្ឋម្នាក់ៗ អាចជួយដល់ការពង្រឹងលទ្ធភាពប្រកួតប្រជែងរបស់ប្រទេសជាតិក្នុងបរិបទសាកលភាវូបនីយកម្ម និងការចាប់យកនូវឱកាសសក្តានុពលនានា ដើម្បីឈានទៅកាត់បន្ថយគម្លាតនៃការអភិវឌ្ឍ តាមរយៈការទាក់ទាញវិនិយោគកម្រិតខ្ពស់ដែលប្រើប្រាស់បច្ចេកវិទ្យាទំនើប ហើយជាពិសេស គឺការធានាបាននូវភាពឯករាជ្យម្ចាស់ការលើគ្រប់វិស័យប្រកបដោយមោទនភាពជាតិសម្រាប់អនាគតដ៏វែងឆ្ងាយ»។
ដើម្បីក្លាយជាធនធានមនុស្សដ៏ល្អសម្រាប់ប្រទេសជាតិ លោកបានផ្តល់អនុសាសន៍មួយចំនួនដល់និស្សិត ត្រូវបន្តរៀនសូតដោយឥតឈប់ឈរ ត្រូវប្រឹងប្រែងបំពេញការងារគ្រប់បែបយ៉ាងឱ្យបានល្អហ្មត់ចត់ និងច្បាស់លាស់ ពោលមិនត្រូវប្រកាន់ថា ជាការងារតូច ឬការងារធំនោះទេ។ ជាមួយគ្នានេះ និស្សិតត្រូវប្រកាន់ខ្ជាប់នូវផ្នត់គំនិតវិជ្ជមាន ដោយត្រូវខិតខំរិះរកវិធីសាស្ត្រដោះស្រាយគ្រប់បញ្ហាឱ្យបានល្អ និងបានឆាប់រហ័ស ជាពិសេសត្រូវអភិវឌ្ឍខ្លួនឱ្យស្របជាមួយនឹងដំណើរអភិវឌ្ឍន៍រួមរបស់ស្ថាប័ន អង្គភាព និងសង្គមជាតិ៕